Бул тууралуу ишемби күнү мамлекет башчысынын басма сөз кызматы билдирди.

Жаңы ачылган тилке өлкөнүн түндүгү менен түштүгүн туташтырууга багытталган стратегиялык Балыкчы – Кара-Кече – Макмал темир жол долбоорунун биринчи этабы болуп саналат.

Салтанат учурунда президент Жапаров жаңы станцияга поезд менен келип, аткарылган жумуштардын сапатын жана инфраструктураны жеке өзү текшерип чыкты.

1. Кочкор жаңы темир жол бекети

2. Балыкчы бекетинен чыккан поезд

3. Кочкор бекетинин ичинин көрүнүшү

4. Өлкө темир жолду ички ресурстардан каржылады

5. Эл аралык логистикага кошулуу пландары

Чыгымдар жана экономикалык көрсөткүчтөр

Мамлекет башчысы курулуш иштери ички ресурс жана адистердин күчү менен жүргүзүлгөнүн өзгөчө баса белгиледи. Анын айтымында, темир жолдун 1 чакырымына 955 миң АКШ доллары сарпталган. Жапаров чет элдик компаниялар сунуштаган баа чакырымына 4,8 миллиондон 6,8 миллион долларга чейин жеткенин эске салып, алардын кызматынан баш тартуу туура чечим болгонун билдирди.

Иш-чарада темир жол тармагындагы өсүш боюнча төмөнкүдөй көрсөткүчтөр келтирилди:

Жүк ташуу: 2025-жылдын жыйынтыгы менен 11 миллион тоннага жетип, 2021-жылга салыштырмалуу (7 млн тонна) 36 пайызга өскөн.

Жүргүнчү ташуу: 2021-жылдагы 255 миң адамдан 2025-жылы 432 миң адамга жетип, 69 пайызга жогорулаган.

Стратегиялык мааниси

Келечекте бул магистраль Кара-Кече көмүр кенин өндүрүш борборлору менен туташтырып, андан ары “Кытай – Кыргызстан – Өзбекстан” эл аралык темир жол коридоруна кошулушу пландалууда. Президенттин айтымында, бул Кыргызстанды континенттер аралык ири логистикалык түйүнгө айландырат.

Салтанаттын соңунда Жапаров атайын ачкычтын жардамы менен тилкедеги акыркы жол бурамасын бекемдеп, жергиликтүү тургундар менен аймактагы туруктуулуктун жана экономикалык өнүгүүнүн келечеги тууралуу баарлашты.